TANGERANG SELATAN,korantangsel.com- Film “Belon Di
Bengkong” Nyeritain tentang kehidupan seorang jawara, pesilat tersohor tapi
belum di sunat (bengkong adalah dialek orang Betawi nyang artinye sunat).Apakah
die mualaf atau lantaran takut,kaga di ketahui asal muasal & sebabnye
kenape jawara eni belon di sunat padahal usianye udeh bangkotan/dewasa. Lepas
dari pade urusan belon di sunat bahwa pelem eni berisikan cara orang Betawi
menyampaikan saran & kritikan yang sifatnye membangun buat negeri eni
(Indonesia) buat pare pemimpin/penguase yang sebagian besar sukanya nyunat
/motong / korupsi anggaran rakyat nyang semestinye menjadi amanah dari rakyat
ntu sendiri.
Kenape tokoh jawara silat di pilih lantaran jaware silat nyang
udeh kesohor bise menjadi bagian contoh / public figure buat sebagian orang.Ternyata
dalam contoh-contoh nyang di kasih ame orang-orang sekitarnye,die sendiri belon
ngelaksanain nyang namenye sunat ( ujung kelamin laki2 nyang di buang / di
potong lantaran berpotensi menyimpan kotoran ) di mane kate orang Betawi nyang
rate2 pade mengaji kalo belon di sunat segale sesuatu amalan bae nye semacem
wudhu,sholat dan laennye kaga di anggap sah/ di terime ame Allah SWT lantaran
belon bersih jasmani & rohani.Banyak pemimpin negeri eni sebenernye nyang
belon di “Sunat” secara hukum Islam, mengkenye gaweannye seneng nyunatin
anggaran ( nyunat anggaran/korupsi ).
Dalam bahase nyang sederhane di kesearian orang betawi nyang
seneng humor & ngejeplak tapi cerdas mustinye pare koruptor di
reposisi/diganti/di geser aje jabatannye jadi Tukang Bengkong / Tukang Sunat
Beneran ( Tukang Khitan ), jadi kalo jadi Tukang Bengkong kaga ade nyang di
rugiin justru malah nguntungin ketimbang jadi pemimpin negeri eni nyang katenye
negeri nye kaya raya melimpah sumber daya alamnye tapi rakyatnye masih banyak nyang
suse sampe di bawah garis kemiskinan.
Dalam rangke peringatin Hari Sumpah Pemuda,selaen Satu Nusa,Satu
Bangsa & Satu Bahasa,kite semue orang Betawi khususnye nyang ade di
Perguruan Silat Beksi Sanghiyang Putih Kp.Perigi bersumpah juga bakal ikut ngeberantas
para koruptor nyang udeh ketauan gaweannye nyunatin anggaran rakyat.Akhir
cerite bahwa pelem eni di bikin buat nyampein pesen ame pemimpin nyang korupsi
/ para koruptor ntu namenye, Pemimpin nyang “belon di bengkong”.
(korantangsel.com- djay bin mursin/ ahmad baihaqi)
